Рагьимат Гаджиевадиз

Руг акьалтна чардахдик квай зат1аркай,
Вил акьуна куьгьне тир са чувалда.
Заз ак1 хьана- кватна зун ахваркай:
Шумуд йис тир аваз абур и гьалда?

Ахвудна ам к1аникди за къужахна,
Эцигна мад эвел хьайи пенжерда.
Фикирри зун аялвилиз хутахна,
Рик1ел хкиз билбилдин ван, эсердай.

Чан къгъайла патефундал ч1улав тир,
Сифте сесер балабандин акъатна.
Акваз-акваз перде хьтин, къиравдин
Иличай пас рик1елай фад алатна.

Ахпа, рахаз шагьвардивди дагълара,
Акъатай сес гагь к1еви, гагь секин тир.
Къугъваз хьана хияларни яргъара:
Адан къуват, адан ери къизгъин тир.

Шуьк1уь гъал хьиз, авахьзавай булахдин
Ст1алрикай гурлу вац1ун хел хьана.
Дагъларикай мани лагьай дамахдив,
Мад сефер зун сесинал мягьтел хьана.

Гагь Самурдиз ухшар тир ам, шуршуриз,
Мет1ерал къвез къугъвазавай к1ел хьтин.
Гагь Ахцегь-вац1 рахадай лап гургуриз,
Къванер гатаз, пехъи хьана, сел хьтин.

Гагь рушари мани лугьуз, сувара
Цуьквер к1ват1из, хъуьрерзавай сес къведай.
Т1ебиатди зигьин гана, кинарай
Ван атайла, мадни хуш гьевес къведай.

Къуллугъ авун Ватандиз ви игьсан тир,
Вилик фенай машгьурвал са кьадамдин.
Са зеррени синих квачир инсан тир,
Макьаматдин чешне хьайи аямдин.