Гьик1 лугьудач

Гьик1 лугьудач, и к1анивал, са зи чандиз пара хьанва,
Язух рик1е гьатна куз-куз, эх тежедай хара хьанва.
Килигар кьван ви акунриз, закайни бей-чара хьанва.
Бес за вучин, я чан гуьзел, чи гьисера ара хьанва,
Вун галачиз акъудзавай йикъар вара-зара хьанва.

Акьул авай касдин къайда, муьгьуьбатдиз есир жедач,
Я садазни, акьул квахьай, ашкъидикай хийир жедач.
Гьикьван на заз лагьайт1ани- чаз адакай эхир жедач.
Ви вилерин нур галукьай, бес гьик1а заз фикир жедач?
Гуьзелди, зи хуравай ц1ай йикъандавай пара хьанва.

Иландин мез акур касдиз, керчеквилин къадир жеда,
Кьат1ун авай бендедикай, са к1ус гайт1а, шаир жеда.
Муьгьуьбатди к1ур гайит1а, гьайиф тушни, фагъир жеда.
Ви гуьрчеквал себеб хьана, закай, белки, загьир жеда.
Язух рик1е ашкъидикай, эх тежедай хара хьанва.

Успагьивал гайидахъ ваз, чаз таквадай асул ава,
Вилик квай гьал кьат1унзавай, вазни кьет1ен акьул ава.
Ви акунри инсаф тийиз, мадни къе зун сугъул ава,
Ашкъидин гьисс к1евир ийиз, к1еве гьатна, бат1ул ава,
Бес за вучин я чан гуьзел, чи гьиссера ара хьанва?

Зун пенжердин к1аник ква, йиф гъетерив диганава,
Дуьнядикай сугъул я зун, вун секиндиз ксанава.
Ви рац1амрин гапурди зи рик1е гелер ат1анава,
И кар себеб, дивана яз, зун ви кьилив атанава,
Яб це гуьзел агъур гафар, зун мадни бей-чара хьанва.

Зи манидин сес физава, шагьвардикай хиял хьана,
Ви гуьрчеквал акур ч1авуз, варзни катна, гачал хьана,
Икьван гагьда яб акалай, бишидини ч1алал хьанай,
Бес вучиз я азизди ваз, жаваб гудай мажал хьанач,
Вун галачиз акъудзавай йикъар вара-зара хьанва.