Садни авач валай иер

Садни авач валай иер чилерал,               
Сегьер-сегьер чинал къведай, нур хьана.               
Йифизни ви суьрет ава вилера-               
Вакай фикир авуниз мажбур хьана.

Беневшадин рангаривди хранвай               
Буй акурла ашкъидивди ац1узва.               
Гьар са лишан устадвилел диганвай,               
Ви назди зи умуд, хиял ат1узва.

Вун дак1анбур пара хьанай, фагъирар,      
Умуддикай пай ат1ана, усал яз.               
Жагъайт1ани рик1из кьвадар жигъирар,       
Амукьнай вун фикирда са хиял яз.          

Вун к1анидан гуьгьуьлдиз хатур ая:               
Ягьанатвал намусдивай чара я.               
Бендеяр я Аллагьдин- сабур ая,               
Белки вунни залайни бейчара я.

Яб гумир на куш-кушзавай иландиз:               
Ван хьайит1а, зи рик1изни т1ар жеда.               
Зи гафарихъ яб акала хъсандиз:               
Ви бахчадин кьулал т1арам тар жеда.