Муьгьуьбатди яд гайи тар,
Заз ви хилел к1вал жедат1а?
Авурт1а вавди суьгьбетар,
Рик1из яраб сал жедат1а?
Лагьайт1а ваз, чан назлу яр,
Зи гуьгьуьлар т1ар жеда жал.
Ашкъидикай хьана инкар,
И дуьняни дар жеда жал.
За вуч ийин, цававай лиф,
Ви эхъендик ц1разавай.
Зи бахчадиз ая илиф,
Вахъ вил галаз кьуразавай.
Кьулал алай гимишд кемен,
Гимишд кемен низ герек я?
Гьиссерив бул шумал беден,
Виридалай вун гуьрчек я.
Хуш акунрив хур ац1уриз,
Нефес къачуз залан тахьуй.
Рик1е гьиссдин тур ак1уриз,
Гьиссерикай гьижран тахьуй.
Килигайла, назлу тават,
Хъвер авунихъ ц1игел я зун.
За лугьуда ваз ви къамат,
Ви къаматдал мягьтел я зун.
За лугьуда ваз ви къамат
© Copyright: Магомед Мирзоев Мирзой, 2025
Свидетельство о публикации №125022508911
Свидетельство о публикации №125022508911
Рецензии