ШЛЯХ ДА РАЮ

ШЛЯХ ДА РАЮ
леанід ПРАНЧАК

Вярнуся з цёплых сноў
У люты холад рання,
Дзе ты, мая любоў,
Дзе ты маё каханне.

Машчу праз ноч масты,
Шукаю наталення...
Яго мне дорыш ты
Пяшчотна да дрыжэння.

Рознамаіты свет...
Ды ў ім пачуццем шостым
Маёй любві сакрэт
Калі і ёсць, то просты:

Спагадай атулю,
Ад бедаў уратую,
Бо я цябе люблю
Рэальную, зямную.

Упартай, несвятой,
Гарачай і адданай,
Збянтэжанай, слабой,
Але такой жаданай.

Бо ў вобліку тваім
Прывычным і звычайным
Я паланёны тым
Святлом нябёсаў тайным,

Што ў стоеных вачах,
Праменіцца і ззяе,
Што ў русых валасах,
Як золата палае;

Што ў словах дарагіх
Успыхне, як цяпельца,
Калі ад гукаў іх
Маё трапеча сэрца.

Прыгожая мая,
Каханая да болю,
Зачараваны я
Штодзённаю табою,

Калі мне ўсё, што ёсць,
Калі мне ўсё, што маю,
Як цуд, як прыгажосць,
Як доўгі шлях да раю!

21.03.2022


Рецензии