Са вахтунда гьатнавай вун гъамара,
Къе эхъвезвай вун ракъинин нурара.
Вуч хиялар гьатна ви чанда ширин-
Гелни амач ви к1алубда гьич серин.
Бахтуни ваз ашкъи, гьевес багъишна,
К1анида вун бике хьиз лап саймишна,
Рик1е анжах ашкъидин гьисс къугъвазва,
Вилера бахтунин нур тек авазва.
Рик1елай алуд фейи йисар туькьуьл,
Ягъ туьнт макьам, ийидайвал са зарб кьуьл,
Квез герек я туп1алай авун дердер,
Алатуй рик1елай залан тир мермер.
Накь куьтягь хьана ч1улав тир йикъар,
Къе вахтун чарх элкъвена вахчуз гьахъар,
Шадвилив къугъвазва бахт цуьк хьиз гарал,
Мад т1алабмир зат1ни гъил алаз хурал.
Вун иес я гележегда бахтунин,
Есир жемир садрани вун вахтунин,
Вилик кума хейлин къастар эрзиман-
Анжах виликди! Хьурай ваз зи ван.
08.02. 2025.
Анжах виликди!
© Copyright: Нажмудин Шихнабиев 2, 2025
Свидетельство о публикации №125020807210
Свидетельство о публикации №125020807210
Рецензии
