Ажеб тир авайт1а терезар,
Алцумдай хъсан ва пис терефар,
Чир жедайвал гьар са инсандиз,
Квай хесетар вичик лап хъсандиз.
Мут1лакьвал,мискьивал фий чилиз,
Къургъар гунни гьарайиз к1евиз,
Герек туш чарадан кефи хун,
Нубатсуз сад садав чуьруьк хьун.
Хуш къведач къал авай к1вализ физ,
Папан чин ч1уруз юкъуз-йифиз,
Хуьрекдихъ т1ям жедач и к1вале,
Агъу к1ват1завай рик1ин къене.
Дуст герек туш,ийидай фитне,
Русвагьна вун, гъидай са леке,
Пехилвал авайдини рик1е,
Юлдаш гьич тахьуй фидай рекье.
Лавгъавални пис я хьун меце,
Азар я, твазвачт1ани месе,
Са вичелай тарифдай семе,
Табдин к1ват1 я тежер кьван еке.
Инсанрин къилихар алцумдай,
Са зат1 ава вичиз къалумдай,
Виждан я ам ви намус михьдай.
Виш йисузни кьац1ун тийидай.
Яраб рази жедат1а вири,
Шиирни инал ийин куьруь,
И девирда мезни жеда къуьруь,
Къуй вилик фий мез гвайди яргъи...
08.02.2025.
Ават1а терезар
© Copyright: Нажмудин Шихнабиев 2, 2025
Свидетельство о публикации №125020806427
Свидетельство о публикации №125020806427
Рецензии
