Чан зи дашар, зи халуяр, стхаяр,
Чан юлдашар, зи къуншияр, архаяр,
Чан зи къаншар, зи балаяр, мукьваяр,
Куьн я вири зи девлетар, къелеяр!
Чан азизбур, чан хуьруьнбур, масанбур,
Чан дередин хайибур хьиз хъсанбур,
Чан к1валинбур, чан къецинбур, жуванбур,
Куьн я вири зи девлетар, къелеяр!
Ча зи Диде-чилел алай вирибур,
Нурлу рагъ хьиз, рик1из пара чимибур,
Куь, къачузвай, кьадамар хьуй къенибур,
Куьн я вири зи девлетар, къелеяр.
Куьн гьарма сад гьар са кардал уртах я,
Куьн зи рик1ин руьгьдин шадвал, дамах я,
Куьн гьарма сад хайи чилин булах я,
Куьн я вири зи девлетар, къелеяр!
Куь крарин, куь ч1аларин винеллаз
Лув гузва за гьамиш дуьа мецеллаз,
Вилин нине хьиз хуьда куьн, рик1еллаз,
Сад Аллагьдин патай зи пак савкьат яз!
Секина. Куьн я вири зи девлетар
© Copyright: Магомед Мирзоев Мирзой, 2025
Свидетельство о публикации №125011503712
Свидетельство о публикации №125011503712
Рецензии