Вэлюм
леанід ПРАНЧАК
Снягоў сляпучых замець.
Не рады я вясне,
Бо ты выходзіш замуж,
Але не за мяне.
Жыць у цяпле і згодзе
І ў ласцы да таго ж.
Галоўнае – выходзіш.
І дробязь – за каго.
Балюча гэта бачыць.
Ды што магу зрабіць?
Такі ўжо лёс лядачы:
Здалёк цябе любіць.
Была вясна студзёнай.
Дрыжэў царкоўны звон.
Была туга зялёнай
І кіслай, як лімон.
Сарваў скразняк твой вэлюм
І па двары панёс...
Павер, шкада і вельмі.
Шкада, але не лёс.
Ні слова, ні паўслова
Не мовіў наўздагон.
Ты ж не мая палова,
Ты ж толькі дзіўны сон.
Бядовае замужжа.
Няскладнае жыццё...
Хацелася і дужа
Табе змяніць усё.
А я такі зацяты,
Як бусел на дажджы,
Жыву, як вінаваты,
Табе зусім чужы.
За што, чаму, навошта?
Пытаўся я не раз.
І тэлефон і пошта
Маўчалі мне ў адказ.
Мінула столькі летаў.
Ды помню той мароз...
Склаў песень і санетаў,
Напэўна, я цэлы воз.
Распальваю, бывае,
Я вершамі камін.
Дыміць і не згарае
Мой боль і прыпамін.
Твар, бы ікона, чысты.
Пралескавы парфум.
І сум такі празрысты,
Нібыта ён не сум.
Таплю я мроі-страсці
У вершах і віне...
Ты выйшла замуж!
Шчасце,
Што хоць не за мяне.
02.02.2022
15.01.2025
Свидетельство о публикации №125011501706