З Новым годам

З НОВЫМ ГОДАМ
усіх
ДОБРЫХ ЛЮДЗЕЙ!

Спакою ў душы, Міру ў свеце.
Астатняе -- прыкладзецца.
Дзякуй усім, хто быў тут!

МАЯ МАЛІТВА
леанід ПРАНЧАК

Раніцай, пакуль не ўстала сонца,
Крочу я ў царкву, нясу свой боль,
Што вярэдзіць сэрца мне бясконца,
Што пячэ, нібыта рану соль.

Спавядацца, каяцца, маліцца
На любой з вядомых змалку моў,
Каб віном і хлебам прычасціцца,
Каб не страціць веру і любоў!

Божа, забяры мой сум і стому,
Шчыра, як магу, малюся я:
Каб усе вярнуліся дадому,
Хто ў дарозе ці ў чужых краях.

Каб матуля сына прычакала,
Каб была шчасліваю сям’я,
Каб жытамі поле красавала,
Каб спяваў свае вам песні я.

Каб была малітва нам патрэбай,
Маці-Беларусь з’яднала нас,
Каб хапала неба нам і хлеба,
Каб мінуў навек трывожны час.

Божа, забяры ў людзей варожасць,
Хцівасць і пагарду забяры.
Я малю цябе, святы мой Божа,
Тых, хто варагуе, – паміры!

Каб не згінуў свет у жорсткай бойцы,
Супыні вайну, дымы развей.
Дай нам сілы, мудрасці і моцы
Зберагчы краіну і людзей.

Толькі раз жывём на белым свеце,
Помніць трэба і не забываць:
Гадаваць сыноў, унукаў песціць,
Сеяць жыта, таньчыць і спяваць.

Мы на свет з’явіліся калісьці
Каб не ведаць гора і нуды.
Божа, зберажы нас і ачысці
Ад брыдоты, ліха і бяды.

Да цябе звяртаюся ў пакоры,
Ты, сапраўдны Бог магутны мой,
Не пакінь у роспачы і горы
Родны край спакутаваны мой!

Раніцай, пакуль не ўстала сонца,
Крочу я ў царкву, нясу свой боль,
Што вярэдзіць сэрца мне бясконца,
Што пячэ, нібыта рану соль.

Спавядацца, каяцца, маліцца
На любой з вядомых змалку моў,
Каб віном і хлебам прычасціцца,
Каб не страціць веру і любоў!

07.12.2024


Рецензии