53. Надир-шагь чукуруникай мани

Ясдин чуьллер, ясдин чуьллер,
Ясдин чуьллер, яд къаралмиш!
Чибур жеда шадлух кьуьлер,
Шадлух кьуьлер, яд къаралмиш.
Ясдин чуьллер, яд къаралмиш,
Чна уна межлис къурмиш.
И межлисдал ала вири:
Лезги эллер гъвеч1и-ч1ехи.
Ц1ай яна, вун кана, душман,
Ви невеяр хьурай пашман,
Ирандихъай атай гьайван!
Харап1 хьуй ви мармардин к1вал,
Ви кьисмет хьуй ясардин к1вал!
Гургурдиз лап акъатрай вун,
Жегьенемдиз аватрай вун!
Гьиниз фена ви шад кьушун,
Чи эллерал авур гьужум?!
Гьаргьар Надир, вун я ахмакь,
Ви гъуцари ваз уна агь!
Гила ахлад верч хьиз йигъи,
Гьа вун атай  Ирандиз ви!
Гьунарлу я лезги эллер,
Пуд къуз жеда ина кьуьлер!
Ирандиз фий чи къивдин ван,
Азраилди къачуй ви чан!
Чи чил вири я куь кьеркьер,
Ибур тирни ви шад лекьер?!
Табасаран, Куьре, Къуба,
Вун барбат1ай я хьи зурба!
Я хьи зурба, я чан эллер,
Хци я куь алпан хьелер!
Хци я куь турар къизмиш,
Душман рекьиз гъилив вердиш!
Чи шиверин гьерекат зарб
Акурдан рик1 жеда хьи т1ар!
Чи хьелерин к1уьввидин сес
Хьайи касдин кьада нефес!
Кьада нефес, я чан эллер,
Куьне ая къизгъин кьуьлер!
Къагьриман чи халкьдин гьунар
Гьакъикъат я, туш хьи ахвар!..