Секина. Ахцегь хабар 24

Вун мугьман я гьар са к1валин,
Вун дарман я сугъул рик1ин,
Ваз чи патай хьуй аферин,
"Ахцегь хабар" гузвай Админ!

Къени багъда емиш таран,
Хилер хьиз чун ава чк1ан,
Чаз къвезва пак Самурдин ван,
"Ахцегь хабар" гузвай Админ!

Шумуд йис я вун юлдаш яз,
Гьахъвилелди зегьмет ч1угваз,
Ви михьи рик1 аквазва чаз,
"Ахцегь хабар" гузвай Админ!

Гаталай гатфаралд йигин,
Чаз хабарар къвезва къалин,
Къуй кефи ви тахьуй серин,
"Ахцегь хабар" гузвай Админ!

Садаз хуш я экуьн сегьер,
Садаз мич1и цавун гъетер,
Гьар жуьре я къилих мегер,
"Ахцегь хабар" гузвай Админ!

Диб ава чаз- т1вар я лезги,
Садвал хьурай арайра чи,
Аллагьди чун хуьрай вири,
"Ахцегь хабар" гузвай Админ!

Бахт авачир тахьурай кас,
Са рик1ени такъурай пас,
Лезгидиз я инсанвал хас,
"Ахцегь хабар" гузвай Админ!

Экуь рагъ хьиз галаз хьуй чахъ,
Шад хабарар гуз гьар патахъ,
Хъсан крар хьурай уртах,
"Ахцегь хабар" гузвай Админ!