Гаф дегишна

Чагъа бала такунамаз вилериз,
Элхкъуьрзавай, капач вигьиз къуьнериз.
Тебрикзавай бейтериз за к1ур гана,
Гаф дегишун- им са беябур хьана!

Ахвар квахьна къатадзава йифериз,
Жув бат1ул яз, са низ ят1ан эвериз.
Шайт1ан акур к1валахар чур-чур хьана,
Гаф дегишун- им са беябур хьана!

Хибри хьайи кьилизни мад т1ар хьана,
Аламатдин, лугьуз тежер кар хьана.
Я чан бала, ви кефияр ч1ур хьана,
Гаф дегишун- им са беябур хьана!

Юбудикай виридаз айгъур хьана,
Зал атайла а гьайван какур хьана.
Чидач вучиз, бейтерин хатур хана,
Гаф дегишун- им са беябур хьана!

Пара вахт тир фитнечидиз пис хьана-
Ч1уруд зун я: ацукьнавай кис хьана.
Кеф ч1угурай, рахурай гур-гур хьана,
Гаф дегишун- им са беябур хьана!

Гьикьван хьурай зи гуьгьуьлар пис хьана,
Минет я, фад атурай йис, кис хьана.
Лугьузва мад, са к1ус кьван сабур хвена,
Гаф дегишун- им са беябур хьана!

"Югъурдикай" "юргъун"* хьун я аламат,
Хвеназ к1ан я жуван къалам саламат.
Имни мад са тийижир ахмур хьана,
Гаф  дегишун- им са беябур хьана!

Я кьей хва, компьютер, ви гьал дуьз яни?
Вун расайди тахьайт1а ягьсуз яни?
Гуьрчек рушан иер бендер ч1урна за,
Гаф дегишна жувни беябурна за!

Ц1ийи йисуз куь гуьгьуьлар шад хьурай,
Гъам-хифетдикай вири азад хьурай!
Жедай кар я, мад кефияр ч1ур тахьуй,
Гаф дегишар ийиз беябур тахьуй!

*-Секинадин "Хъфизвай йис, югъур хьуй ваз!"
  шиир чап ийидайла, за "югъур" гафунин бедал,
  компьютерди опечатка авуна, "юргъун" кхьенай.