Пак гьисер гваз гьар са к1вализ,
Ц1ийи свас хьиз атанай шаз.
Гил хтанва эхир кьилиз,
Хъфизвай йис, югъур хьуй ваз!
Са касдиз вун хайи йис тир,
И дуьньядин илгьам акваз.
Садаз эхирмижи йис тир,
Хъфизвай йис, югъур хьуй ваз!
Ц1ийи йисуз аквадайбур
Хъсанвилер хьуй виридаз.
Тахьурай гъам ч1угвадайбур,
Хъфизвай йис, югъур хьуй ваз!
Садаз вуна шадвал гъана,
Бахтунин таж кьилел алаз.
Садан кьилел на хар къвана,
Хъфизвай йис, югъур хьуй ваз!
Къаяр-мекьер, гьахъсузвилер,
Хутах ая къужахдаваз.
Чаз багъиша секин рик1ер,
Хъфизвай йис, югъур хьуй ваз!
Пакадин югъ экуь жедай,
Инанмишвал аваз хьуй чаз.
Ислягь хьуй йис ц1ийиз къведай,
Хъфизвай йис, югъур хьуй ваз!
Секина. Хъфизвай йис, югъур хьуй ваз!
© Copyright: Магомед Мирзоев Мирзой, 2024
Свидетельство о публикации №124121307488
Свидетельство о публикации №124121307488
Рецензии