Зун бубади яд авачир
Мегьтид хуьрел гайиди я;
Патал хуьряй яд гъидай кьван
Зи ширин чан кайиди я.
Къе дагълара т1урфан ава,
Са валчагъдик кваз фейи яр;
Са валчагъдик мекьидачни,
Къеневай рик1 гваз фейи яр?
Къаварилай къаваралди,
Къавал фидай аман амач;
Гуьзел ярдиз ц1ай атана,
Ц1ай ат1удай дарман авач.
Чубарукди муг ийидай
Ирид гьуьлуьн к1ане-вай кьар.
Чубарук хьиз чал элкъведай
Къелемакай гьик1да, вахар?
Накь рагъ авай, къе серинда,
Пака ярдин мел тахьайт1а.
Вун финикай низ дерт ава,
Фидай къара хъел тахьайт1а!
Ви араба гьинал хана,
Вахъ юлдашар галачирни?
Вирибуру шалар гъайла,
Ви къене рик1 амачирни?
Гуьзел ярди ген гузава,
Мукалди хур ччилелай физ.
На жафаяр низ ч1угвазва,
Къизилди гьякь пелелай физ?
Им са дагъ туш, ирид дагъ я,
Ирид дагъда гьик1 къекъведа?
Им са чун туш, аламни я,
Шумал валай гьик1 элкъведа?
46-2
© Copyright: Магомед Мирзоев Мирзой, 2024
Свидетельство о публикации №124112803385
Свидетельство о публикации №124112803385
Рецензии