Таулу къызым къайдаса

Карачаево-Балкарский язык

Таулу къызым къайдаса,
Нечикле эте джашайса?
Мен сагъышлы турама,
Сенге тансыкъ болама.

Эсимден чырт кетмейсе,
Джаныма себеб бермейсе.
Кёрюрге бир бек излейме,
Ауазчыгъынгы кюсейме.

Бир джууаб бермейсе сен,
Сёзюнгю сакълайма мен.
Ауазчыгъынг сени болад,
Булбулну джырына тенг.

Къыйнайса тутуб кесинги,
Танымагъанча сен мени.
Сенден а, мен аямайма,
Не джанымы, не тиними.

Сюймекликге джыр джазарма,
Сенге атаб джырларма.
Джер юсюнде не десенг,
Ариуум, сенге табарма.

Муратларымы билсенг а,
Бир белгичик берсенг а.
Джазыб къысха джазыучукъ,
Джаныма дараджа этсенг а.

Джюрек, тахсалагъа алимди,
Кёз къарамынг кирсизди.
Кесинг сабий кёрюнсенгда,
Этген буйругъунг чексизди.

Джаш къауумну термилтесе,
Чыдамсызны тас этесе.
Сюйюб, кюйюб барсамда,
Чырт да меннге эс бёлмейсе.

Нек алай къыйнайса сен?
Кесек къууаннганлай мен.
Къатылыгъынг сени болад,
Джюрегими эзген тирмен.

Джюрегиме туз себесе,
Сылгъа, сылгъа кесесе.
Шынкъарт отха кёмейсе,
Къаргъа, бузгъа бёлейсе.

Эки джарсангда джюрекни,
Тас этмезме сюймекликни.
Ариуум, менге бир тынгыла,
Берсенг а, дуния игиликни!

Дуниямы джарыгъы, тохта!
Буйур меннге, уллу саугъа.
Кёзлерим къараб бир тойсунла,
Саулай сени ариулугъунга:

Кёргюст ариу сыфатынгы,
Кюнча, нёрлю чырайынгы,
Къутас, толкъун чачларынгы,
Тогъай къыйылгъан къашларынгы.

Джарыкъ, джулдуз кёзлеринги,
Узун, къара кирпиклеринги.
Къызыл-наныкъ эринлеринги,
Инчи тизилген тишлеринги.

Бурунчугъунг кёз байлайд,
Сюйегинг а - субай нарат.
Сыйдам санларынгы акълыгъы,
Сейир, джандет, акъ гюлчад.

Чакъгъан гюлню ийинсисе,
Дуния насыбны иийесисе.
Ариучугъум сен саулай,
Сюймеклик кёлню теренисе.

Сен мёлкча бир джарыкъса,
Сюйюмлюсе, чырайлыса.
Адам тили айталмазча,
Джер юсюнде эм ариуса.

Алимлени эм башчысы,
Джашау сынагъан акъыллысы,
Чырт табалмаз дунияда,
Сенге тенг адам баласы.

Сенсе къууанч кёзлериме,
Сенсе насыб джюрегиме.
Сени кёрюб, таныгъанлы,
Тынчлыкъ табалмайма кесиме.

Сенсе татым джашаума,
Сенсе балхам санларыма.
АЛЛАХ сюйген къыз сабийсе,
Магъанаса джаныма.

Ариулукъну АЛЛАХ бергенд,
Сюймекликда АНДАН келгенд.
Ариу къызланы сюйерге,
Пайхамбар С.А.С. осият этгенд.

Бийге - оноуу сый беред,
Джарыкъ джол бла ол элтед,
Сюймеклик джанынга кирсе,
Акъылынгы тас этед.

Болалмай кесиме ийе,
Кюнден кюннге бек сюйе,
Сагъышладан тюйме тюйе,
Джашайма бузлай, отда кюйе.

Джюрек ачысын къалай хорлайым?
Сени кесиме къалай байлайым?
Анама сени келинчик этиб,
Насыбдан къалай толайым?

Бир кёббюз сени сюйгенле.
Къайсыбыз джетебиз кёлюнге?
Кечериксе, тикерал айталмадым,
Болгъаныча кёлюмде.

Сен джашайса узакъда,
Кём-кёк сууну бойнунда.
Сени ариу ышаргъанынгы,
Тюшюмде кёреме хаманда.

Хар бирибиз да ийнанабыз,
Ашхылыкълагъа ашыгъабыз.
Джаным, саным да бир болуб,
Сени излеб - джолдабыз!..