45-3

Ттарал алай лацу п1ини,
Тар-тар ат1уз, вегь гьебедиз.
Вун руш к1андай гада ят1а,
Ша чи к1вализ, лагь дидедиз.
(Ваз рик1ивай зун к1андат1а,
 Ша, катра хьиз, лагь дидедиз).

Яр я лугьуз на вуж кьуна,
Самар авай бажгъан хьтин?
Ваз адалай зун хъсан тир,
Устулдал-лай ч1агъан хьтин.

Къацу ч1урал къайи булах,
Гъвеч1и чубан къвез ацукьда.
Гъвеч1изамаз гъуьлуьз гай руш
Мисин кьулал шез ацукьда.

Са дак1арда кьве самовар,
Сад садалай гуьрчек я жал?
Са гададиз кьве руш к1анда,
Яраб, гафар керчек я жал?

К1енибуруз хьайи вахар,
Хьайи вахар, закай рахух.
Дак1анбуруз гайи рушар
За лугьуда, вири шехьухь.

Багьаз къачур ц1ивиндикай
Тавдин кьулал басма кьуна.
Хуьре дак1ан гададикай
Зи бубади езне  кьуна.

Ч1улав раган кьилелай фей
Са луж лифер ишезава.
Къинемишмир, хва кьей эллер,
Зун к1енидаз тежезава!

Гьуьлерилай туп ягъайла,
И дуьньяда гьатда зурзун,
Икьван к1ани ваз тахьайла,
Самур вац1уз вигьида зун.

П1инид ттарцин хилер кьуна,
П1инид ттарак гьатин чун кьвед.
Икьван чун чаз к1ан хьайила,
Ша, гъил зав це, катин чун кьвед!

Агъадихъай экъеч1ай рагъ
Бубад к1валин гулце (а)кьурай.
Рушан хатур хамир, диде:
Вичиз к1ани гада кьурай.