45-2

Вун пенжердай виниз килиг,
Зун пенжерда авазава.
Ви рик1 акьван зайиф жемир,
Зун дагана амазама.

Т1аз къаткана мисевай яр,
Мисевай яр, вуч хьана ваз?
Дуьньядилай к1ан хьайи яр,
Ваз тахьана, гуж хьана заз.

Агъа тавдай вини тавдиз,
Тавда гьатай чуьнгуьрдин сес.
Я к1ениди гъай бахтавар,
Заз к1ениди хьанач хьи, бес.

Ц1айни барут са шуьшеда,
Ам такана амукьдани?
Чаз кьведазни к1ан хьайила,
Вун бубадал алукьдани?

Вуч лацуд я зи ярдин пел-
Истулдал-лай лацу лаваш.
Душманарин хъилерайни
Ваз къведачт1а гила тамаш.

Ша, чан вахар, дагълариз фин,-
Дагъларавай къацу явшан.
Зун туна на масад гъайт1а,
Вун шад ят1а, зун туш пашман.
(Ч1улав чархай яд хъвай гъуьлягъ,
Валлагь, яр, зун ви душман туш.
На зун туна масад гъайт1а,
Вун шад ят1а, зун пашман туш).

Чуьхвер таран чхелдал-лай,
Чхелдал-лай хур хъипи нуьк1.
Алмасди хьиз ат1ана хьи,
Ви дидеди чи кьведан рик1.

Ирид багъдиз яд гузава,
Са къизилгуьл цуьк паталди.
Дак1ан вак1аз зун гузава,
Вад виш манат пул паталди.