44-5

Жибинда-вай тек манатар
Завай хурал ициг хьанач.
Вак хьай диде пенжерда-ваз,
Завай ярдиз килиг хьанач.

Кьакьан синел гьик1 экъеч1да,
Пекдин фите пеле-вай яр?
Гьикьван ч1угван за ви дерди,
Чан, таквадай хуьре-вай яр?

И рагъ алай дуьньядилай
Мич1и фуруз физ жедани?
Вун гьакъикъи  яр дахьайла,
Вав рик1ин сир гуз жедани?

Дагъларилай къарагъай яр
Мад аватна яд гьуьлелди.
К1анибур хьай бахтаварар,
Гьала дуьнья шадвилелди.

Къе чи хуьре вуч хабар тир,
Вуч хабар тир, я ччан чавуш?
Зун куьчедай фидай бере,
Заз килигиз ишедай руш.

Вун гьуьлелай гьик1 физава,
Гими (а)вачиз луьткведа-ваз?
Элкъвез кьулухъ заз килигмир,
Зун акурла, шел къведи ваз.

Чинар ттара цуьк авуна
Чуьлда авай панбагди хьиз.
Я гада, на зи рик1 кана
Шишинал-лай кабабди хьиз.
(Машмаш тара цуьк акъудна
Базардал-лай панбаг хьтин,
К1ани ярди рик1 акъудна
Шишинал-лай кабаб хьтин)

Кьасума хуьр агъадава,
Са т1имил кьван вине к1ан тир.
Агъдин перем алай хала,
Заз вун авай к1вале к1ан тир.

Экъеч1, экъеч1, къавал экъеч1,
Къавал-лайди гар ят1а (а)ку.
Заз чуьнгуьрдин ван къвезава,
Гьам чи гуьзел яр ят1а (а)ку.