Им рушарин мегьли къар я,
Мулдин цуьквер нез къекъведай;
Гадаярин дели къар я,
Рушар квахьна шез къекъведай.
Вун а пата, зун и пата,
Девит-къелем гъилевай яр;
Вуна тамам чаз шел гъида,
Ч1улав сердер пеле-вай яр.
Къизилгуьлдихъ ялвар авур
Беневшадин гардан патахъ.
Гила за вун терг авуна
Фена (а)цукь вун ченгид къвалахъ.
Ччин к1аникна багъда къаткук,
Ваз ахварай зун акурай.
На чуьнгуьрдал "Бала" ягъиз,
Ви гъавурда вуж акьурай?
Гуьнед к1аняй къвед рахада,
Къвед рахада фарси ч1алал.
Яр зи ччина бед рахада,
Яраб, ярдиз яр ава жал?
Ви чуьнгуьрдал ц1икьвед седеф,
Чуьнгуьр ярдин гъиле к1ан я.
Яшарикай вушта вахар,
Акьул ярдин кьиле к1ан я.
Цавай фидай вили лифрен,
Вили лифрен лувариз кьий,
Дуьньядилай к1ан хьайи яр,
Ччар кхьидай туп1ариз кьий!
Зун пенжердай килигайла,
Циф ацукьай нашравдин яд.
Яраб, вахар, жигъидай жал,
Т1алабурт1а рик1ин мурад?
44-3
© Copyright: Магомед Мирзоев Мирзой, 2024
Свидетельство о публикации №124111902786
Свидетельство о публикации №124111902786
Рецензии