Лайла, бала, лайла,
Гъвеч1и бала, лайла!
Ширин т1варар алай,
Ч1ехи паяр авай
Азиз бала, лайла!
Яргъи хъуьт1ер хъфиди,
Лацу живер ц1ради,
Ч1улав цифер чк1иди
Лайла, бала, лайла,
Дарман бала, лайла!
Гатфарин къар ачух жеди,
Салан т1улар къацу жеди,
Ттаран кук1вар лацу жеди
Лайла, бала, лайла,
Масан бала, лайла!
Гьар са цуьквед са ранг иди,
Гьар са нуьк1ре са ван иди,
Чи рик1изни дарман жеди
Лайла, бала, лайла,
Хъсан бала, лайла!
Бубадин кьве вил я вун,
Дидедин гевил я вун,
Экуьнин билбил я вун
Лайла, бала, лайла.
Ширин бала, лайла!
(Дукъкъузпара райондин Мискискар хуьре
30 йиса авай, к1ел-кхьин чидай Хелилова
Асиядвай Гаджиев Агъалара кхьейди я.
Октябрь-1940 йис).
42
© Copyright: Магомед Мирзоев Мирзой, 2024
Свидетельство о публикации №124111803594
Свидетельство о публикации №124111803594
Рецензии