41. Ай гуьлуьм

       Гадади:

Кьакьан синел за сил цада,(2 сеф.)
За сил цада къушариз гуз.
За жибинда ичер твада(2 сеф.)
Цел физавай рушариз гуз.
Ай гуьлуьм, буьлбуьлим, жейраним!(2 сеф.)
Чан эрзиман, алагуьзли!(2 сеф.)

         Руша:

Кьакьан синел сил цаналди,(2 сеф.)
Сил цаналди сил жедайд туш.
На жибинда ич ттуналди,(2 сеф.)
Ич къачудай руш жедайд туш.
Ай гуьлуьм, буьлбуьлим, жейраним!(2 сеф.)
Чан рик1 алай шуьше къелем!(2 сеф.)

           Гадади:

Т1умир, т1умир, т1уб ат1умир,(2 сеф.)
Чан вилик квай ник1е-вай руш!
Эхир на зи рик1 ат1уди,(2 сеф.)
Лацу фите пеле-вай руш!
Ай гуьлуьм, буьлбуьлим, жейраним!(2 сеф.)
Лацу фите пеле-вай руш!(2 сеф.)

          Руша:

Т1умир, т1умир, т1уб ат1умир,(2 сеф.)
Я чан къулан къвалав гвай яр!
Эхир на зи рик1 ат1уди,(2 сеф.)
Ч1улав мекер пеле-вай яр!
Ай гуьлуьм, буьлбуьлим, жейраним!(2 сеф.)
Ч1улав мекер пеле-вай яр!(2 сеф.)

            Гадади:

Таз ттарал-лай пад яру ич(2 сеф.)
К1еник феналд аватдани?
Рик1из к1ани ярдихъ галаз(2 сеф.)
Къекъуьналди галатдани?
Ай гуьлуьм, буьлбуьлим, жейраним!(2 сеф.)
Зардин ягълух хура-вай руш!(2 сеф.)

          Руша:

Таз ттарал-лай пад яру ич,(2 сеф.)
К1еник феналд аватдайд туш.
Рик1из к1ани ярдихъ галаз(2 сеф.)
Къекъуьналди галатдайд туш.
Ай гуьлуьм, буьлбуьлим, жейраним!(2 сеф.)
Ваз чи хуьре тай авайд туш!(2 тсеф.)

(И манияр - Кьасум хуьрелай, Ст1алдлай, Кьурагьай,
Кьеп1ирдлай, Ахцагьай, Хуьруьгай кхьейбур я.
Гзафбур ДАССР-дин заслуженный артист Гаджиева
Рагьимадвай кхьейбур я. 1935-1941 йисар).