III. 119. Лайла

Лайла, зи бала, лайла,
Я азиз бала, лайла!

Ваз ахварар ширин хьуй,
Ви метлебар кьилин хьуй,
Бала, вун фад к1вачин хьуй!
Я ширин шуьрбет, лайла,
Зи азиз велед, лайла!

Чаз хажалат-гъам амач,
Мад бег, фекьи, хан амач,
Куьгьне пис девран амач.
Лайла, гьай, бала лайла,
Бахт галай бала, лайла!

Чими ракъар чибур я,
Дигай багълар чибур я,
Кьакьан дагълар чибур я
Лайла, гьай, бала лайла,
Рик1 алай бала, лайла!

Вун гатфарин цуьк1 я вун,
Мани ягъир нуьк1 явун,
Дидедин лап рик1 я вун,
Зи кьве вилин экв, лайла,
Ватандин дирек, лайла!

Хъвера, шад хьухь, ччан бала!
Вал дидедин вил ала;
Чи уьлквед винел, ч1ехи
Сталинан гъил ала.
Я зи ччан, жигер, лайла,
Я ширин шекер, лайла!

Винтовка гъиле аваз
Игит хьиз сергьятда къваз,
Кьегьаливилер къалурна,
Чар кхьихь Ворошиловаз!
Лайла, ччан бала, лайла,
Зи масан бала, лайла!

Уьтквем хьухь вун, аслан хва.
Кьулухъд элкъвейт1а, ччан хва,
Дидед гай нек гьарам хьуй,
Жемир вун зи душман, хва!
Лайла, зи бала, лайла,
Играми бала, лайла!

(Ахцагь райондин Хуьруьгви, к1ел-кхьин
тийижир, 50 йиса авай колхозник Зулейха
Гаджиевадвай Гаджиев Агъалара кхьена
туьхк1уьрайди я. Ноябрь - 1940 йис.)