Азархана-5

"Мез авачир етимар
Гадарзава ц1аяриз:
Са к1ус кьадар намусни
Инсаф амач ламариз.

Жуван халкьар вагьшиди
Терг ийизва, к1ур гана
"Пачагь", лугьуз вичизни-
Им вуч беябур хьана.

Ихьтин пачагь вак хьурай,
Чарад вилик кьуьл галай,
Итим, лугьуз, фурс ийиз,
Вичихъ са вад гъуьл галай.

Рагъ ак1идай патахъай
К1ват1 хьанава чакъалар-
Кискис гудай ахмакьриз,
Къаткай месик кьегьалар.

Ихьтинбурун гъилевай,
Гьайиф къвезва етимрин,
Кьегьалвилер, бинедлай,
Квадарнавай итимрин.

Ингилисриз, бендерриз
Донбасс хьанва гурхана.
Чарадан тум чхейдан,
Алчах уьмуьр ч1ур хьанай...

Мукъаятдиз хтана,
Чун кьведни са кьадарниз,
Мад атана "къузгъунар",
Элкъвезавай ч1агъар хьиз.

П1еркьи хьайи бендерриз
Аквазвачни жуванди,
Амачни мад са к1ус кьван
Язух, регьим инсандин.

Са кьвед-пудан хурукай
Хкатнай чун, ярх хьана,
Амма сад чи кьилелай
Алатнач, гъуьлягъ хьана.

Эхир, вегьей бомбади
Кьил кьилелай алудна,
Са сят-кьве сят, чидач заз,
Са фура зун кучудна.

Жув жувалди хтайла,
Инихъ-анихъ алкьуна,
Накьв алудна винелай,
Ракъинин нур акуна..

Ахпа фена килигна
Вучзават1а етимди.
Агь, буба, ваз къурбанд хьуй!
Эхир тир им регьимдин.

Килигзавай яд хьтин
Вилер ачух цавариз,
На лугьуди, фенвай ам
Аламатдин ахвариз.

Сада садан як недай
Вагьшийри ам телефна
Са сагъ чка амачир,
Бедендикайни сефна.

Зунни, жуван хирерал
Жунад к1усар элит1на,
Валар к1аник чин хьанай,
Дерин фуруз эвич1на.

Йиф хьайи са арадлай,
Дустари зун къужахна,
Носилкадал эхцигна,
Жуван патаз хутахна".