87. 3. Лукьманал-Гьаким

 Адахъ кьве велед хьана. Ибрукай сад хва, муькуьдини руш тир.
Къаркай са йикъуз Лукьманал-Гьакиман хва азарлу хьана.
Лукьманал-Гьакимаз вичин хцин дерт лап хъсандиз ччир хьана. 
Адан рик1елай карч экъеч1на, лугьуда. Гьикьван дарманар
авунат1ани, хцин дердиниз чара хьанач. Гьикьван векьервай,
ттарарвай, гьайванривай, къушарвай хабар кьунат1ани, вирида
чпиз Лукьманал-Гьакиман хцин азардиз дарман ччидач лагьана
жаваб гана.
 Къаркай са йикъуз Лукьманал-Гьакиман гада и азабдик кечмиш
хьана. Ада вичин хцин хур къазуна адан рик1елай экъеч1навай
карч ат1ана. Ам лап жунгадин карч хьтин к1евиди тир.
И хажалатдин йикъарлай са хейлин вахтар алатайдалай гуьгъуьниз,
Лукьманал-Гьакима вичин хцин рик1елай ат1ай карч кант1унин
ттумунихъ акална.
 Лукьманал Гьаким са йикъуз вичин хуьруьнбурукай сада вичин
бустанда илифарна. Адан вилик жуьреба-жуьре недай няметрихъ
галаз са къарпузни гъана.
 Лукьманал-Гьакима гьар са няметдкай дад акуна. Эхирдани вичин
кант1 къарпуздиз янамазди, адан ттум ц1ал вигьей гъеридин гъвел
хьтин ц1рана, яд хьана, авахьна.
 Лукьманал-Гьакима и кардал мягьтелвал авунач, ада лагьана:
 - Къарпуз зи хцин дердиниз дарман тир. Гьайиф за къарпуздвай
хабар кьунач.
 Са гзаф гагьда хиялдик акатна, ахпа ада инанмишвилелди лагьана:
 - Вири дердерин дарманар ччилерин винел, ччилерин къене ава.
Идаз шак авач. Вахт къведа хьи, инсанари абур вири жагъурда.
 Белли, Лукьманал-Гьакимакай чав гьа ихьтин хабар агакьна.

(Ахцагьай, Меджидов Къияса кхьейди я. Август-1937 йис).