87. 2. Лукьманал-гьаким

Ам маса ч1урал эляч1айла, ина авай вири векьер адав рахана,
лагьана:
- Чи душман зегьерлу векь вав рахана, ада вичин зегьерлувал
лагьайла, чавай чун вири дердериз, азарриз дарман тирвал
лугьуз жедачни...
 Аламат хьайи Лукьмана ик1 жаваб гана:
 - Квезх къурбан я, ччан таза векьер, куьн куьз дарман ят1а,
гьи азардиз дараман ят1а лагь.
 Ик1 лагьайла агъзурралди жуьреба-жуьре векьер, цуьквер
са-сад адахъ галаз рахана. Гатфарлай башламишна зулал
къведалди ада вичиз вири векьери, цуьквери гьарда вич
квез дарман ят1а, лагьай келимаяр кхьена. Лукьманахъ
галаз кьакьан, зурба ттарарни рахана. Куьлуь гьайванар,
ттарара авай ничхирарни рахана. Вирида чеб гьи дердиниз
дарман ят1а ачухна.
 Ада гьи векь ва гьи зат1 квез дарман ят1а къалурнавай
са зурба "Т1ибдин китаб" кхьена, лугьуда.
 Вири векьер, цуьквер, ттарар вичив рахунал Лукьман кьадар
авачир кьадар шад хьана. Ада вичин суьруь са шумуд кас
кесибрал- "ибур квез хьурай"- лагьана тапшурмишна.
Вич гьакимвал ийиз инсанрин арадиз фена.
 Ада вири азарриз дарман авуна. Пара инсанар вичелай рази
авуна, ам вири дуьньядиз машгьур хьана. Инсанриз ам гзаф
багьа хьана.
 Халкьди, адан алакьун, бажарагълувал акурла, адаз
Лукьманал- Гьаким лагьана т1вар гана.