85. 2. Ламранни Муса пайгъамбардин мах

Муса вичин рекьиз фена; фена, фена, им агакьна Арафат
дагъдиз. Агакьайла, ида дуьаяр-зат1ар авуна, аллагьдихъ
галаз рахаз башламишна. Вичиз лазим кьван меселайрикай
суьгьбет авуна куьтягь хьайла, Муса элкъвена хъфиз рекье
гьатна. Са вад-ругуд кьадам къачурла, аллагьди адаз
вичин патав эвер хъувуна лагьана: "Мад ваз суалар амани
заз гудай"- "Амач".- лагьана, Муса мад хъфиз эгеч1на.
Мад аллагьди идаз эвер хъувуна, лагьана: "Белки, Муса,
ви рик1елай са кар-зат1 фенва жеди, ваз вуч лугьуз
к1андат1а, ви рик1е вуч амат1а лагь!" Мусади фикирна,
амма сак1ани идаз и ламран гьакъиндай аллагьдиз лугьуз
к1ан хьанач. Эхир аллагьди вичи а ламран шикаят Мусадин
рик1ел хкана, лагьана: "Яб акала, Муса, бес а рекье вал
дуьшуьш хьайи ламран шикаят ви рик1елай фенани?"
Мусадиз регъуь хьана, лагьана: "Ваз вири крар аян я хьи,
я ребби, вуна лагь, за адаз вуч жаваб хгудат1а".
- "Алад, фена а ламраз лагь, эгер вич рази хьайит1а за
вичикай а Жеми хьтин са девлетлу са итим ийида,"- лагьана,
эмирна аллагьди Мусадиз.
 Лам, Муса хкведай вахт гуьзетиз, рекьин патав ацукьнавай.
 Муса хтана, ламраз акунмазди, лам тадиз к1вачал къарагъна
ам къаршиламишиз фена. Патав агакьнамазди ламра лагьана:
"Гьан кван, Муса, ви аллагьди зи гьакъиндай ваз вуч
лагьанат1а, лагь". Мусади лагьана; "Алллагьди заз лагьана
хьи, эгер вун рази хьайит1а, вичи вакай Жеми хьтин са
девлетлу итим ийида". Ламра вичин япар куьрсна, кьилни
агъузна са кьадар фикирна; эхир ада дамах гваз кьилни
хкажна лагьана: "Валлагь, Муса, анихъ галайдан мал недай,
халкьдиз зулум ийидай ахьтин девлетлу жедалди, ик1 хъутур
акатна, гишила и баябан чуьлда амукьунал рази я зун".
 Абур гьанал аламаз зун жуван к1вализ хтана. ( Б. Небиева кхьейди я. 1935 йис).