85. Ламранни Муса пайгъамбардин мах

За квез куькай суьгьбет ийин? Муса пайгъамбардин
кьилел атай са агьвалатдикай.
 Са сеферда Муса пайгъамбар аллагьдихъ галаз рахун
патал Арафат дагъдиз фена кьван. Са кьадар чкадиз
фейила, идал са лам дуьшуьш хьана; идаз, гьич ламраз
фикирни тагана, рекьяй-т1уз физ к1ан хьана. Амма
ламра Мусадихъ ччин элкъуьрна лагьана:
"Я пайгъамбар, вуна салам вучиз гузвач?"
"Я аллагьдин гьайван,- лагьана Мусади,- заз ваз
инсандин ч1ал чидайди чир хьаначир. Вун вуштинди я,
вун и чуьллера вушиз гьатнавайди я?"
 "Зун флан Жеми лугьур девлетлудин лам тир. За адаз
къад йисуз к1валахна, ахпа атана зи сарар аватна,
зун заиф хьана кьуьзуь хьайила, ада зун гьа и ваз
аквазвай, я недай векь, я хъвадай яд авачир, чуьлдиз
чукурна. Эхир зун атана азарлу хьана,
зак хъутур акатна, купулар акатна, кьве к1вачни т1ариз,
завай алай чкадлай юзаз хъхьанач; я заз куьмек ийидай,
я захъ рик1 кудай са касни авач. Гила вуна заз изин це,
вун гьиниз физват1а за вавай жузан"
Мусади лагьаана: "Зун аллагьдихъ галаз рахун патал
Арафат дагъдиз физва"
 "Эгер, ак1 ят1а,- лагьана ламра,- вуна а ви аллагьдвай
жузуз ада заз вучиз ик1 жаза гузват1а, зи гунагь,
зи тахсир вуч ят1а заз чиррай. Гила, Муса, вун ви рекьиз
алад, заз жаваб хкваш".