83-5. Фагьум авай нехирбан

 Нехирбан фена и кумада ацукьна "бей, бей, бей"-
лугьуз вичин тарс эзбериз хьана. Пака экв хьайила,
нехирбандиз, вичиз ганвай вахтункай са югъ фена
лугьуз, гзаф пашман хьана ида к1евиз "сад"-
лагьана (яни са югъ).Угърийри ида вуч ийизват1а
акваз чинеба им гуьзетизвай кьван.
 -"Вагь,-лагьана ибру,-чи к1вал ч1ур хьана; чакай
сад адаз ктабдай чир хьана".
Пака къан экуьнахъ нехирбанди мадни к1евиз "кьвед"-
лагьана гьарайна.
 -"Пагь,- лагьана угърийри,-кьвед лугьурдини чир
хьана хьи".
 Муькуь къан экуьнахъ ида "пуд"-лагьана гьарайна.
Угърийри лагьана:
 -"Хьанач, валлагь, к1вал ч1ур хьана; ша чна фена
идаз вичиз к1андай кьван къизилар гун, ада чун
пачагьдиз лугьун тавурай".
Кумадин кьулухъ чин хьанвай угърийри, фена,
нехирбандиз минетна, лагьана:
 -"Ччан стха, мад чавай са ахмакьвал хьана, вуна
чун пачагьдиз лугьумир; чна ваз к1анзамай кьван
къизиларни гуда, я чна мад амай уьмуьрда угъривални
хъийидач".
Нехирбандиз язух атана, лагьана:
 -"Мад куьне хиве кьазва кьван, ак1 хьайила, а куьне
чуьнуьхай къизилар а флан чинар ттарцин к1аник чуьнуьха,
гена заз гафни це, мад къедлай кьулухъ чуьнуьх хъийидач
лагьана. А пачагьдиз лугьудайвал заз чида, куьне гьич са
фикирни ийимир. Клиг мад чуьнуьх хъувурт1а, захъ умуд
хъийимир гьа!.."
Угърийри лагьана:
 -"Башуьсте!"
Идан гъилериз, к1вачериз темен гана, абур хъфена.