Молитва перед выходом из церкви

В руце Твоего превеликаго милосердия, Боже мой, вручаю душу и тело мое, чувства и
глаголы моя, советы и помышления мои, дела моя, и вся тела моего и души моея
движения, вход и исход мой, веру и жительство мое, течение и кончину живота
моего, день и час издыхания моего, преставление мое, упокоение и воскресение души
и тела моего. Ты же, о премилосердне Боже, всего мира грехами непреодолеваемая
Благосте, Незлобиве Господи! Мене, паче всех человеков грешнейшего, приими в руце
защищения Твоего, и избави от всякаго зла: очисти многое множество беззаконий
моих, подай исправление злому и окаянному моему житию и от грядущих грехопадений
лютых всегда восхищай мя, да ни в чемже егда прогневляю Твое человеколюбие, имже
покрый немощь мою от бесов, страстей и злых человек, враг видимых и невидимых,
руководствуя мя спасенным путем, доведи к Тебе, пристанищу моему и желаний моих
краю. Даруй ми кончину христианску, непостыдну, мирну: от воздушных духов злобы
соблюди: на Страшнем Твоем Суде милостив рабу Твоему буди и причтя мя одесную к
благословенным Твоим овцам, да с ними Тебе, Творца моего, славлю во веки. Аминь.
("Семейный молитвослов"; "Артос - Медиа"; Москва; 2008 год)