83-3. Фагьум авай нехирбан

 Хабар за квез никай гун , хабар са девечидкай;
и девечидин къизилар алай деве квахьна, има и
деведихъ къекъвез и чуьлдиз атанай кьван. Девечи
атана и нехирбандал дуьшуьш хьана, ада салам гана;
нехирбанди, тарс эзбериз, мажал авачирвиляй, вичин
кьил югъурна. Девечиди идавай жузуна:
 -"Я стха, ваз са деве акунани?"- лагьана.
Нехирбанди вичин гъилелди ишаратна, вичиз рахаз
к1анзавачирвал къалурна. Девечидиз ада вичиз деве
фейи пад къалурай хьиз хьана, ам гьа патахъ
деведихъ къекъвез фена; дугъриданни нехирбанди
къалурай патай адаз деве жугъун хъувуна. Девечи
гзаф шад хьана, ида вичи вичикди фикирна:
 -"И кас дугъриданни хъсан, са аламат авай итим я,
ада заз деве фейи пад къалурна, за адаз са т1имил
къизилар тагана хъфейт1а, заз хъсан жедач",-лагьана.
Ида са ягълухдик къизилар кутуна, тухвана адаз гана,
ахпа вичин рекье гьат хъувуна. Нехирбан къизилар
къахчуна вичин папан патав хтана; ида папаз лагьана:
 -"Ма, паб, къахчу и къизилар, амма кьенятдалди харж ая".