Молитва о том, как ухаживать за болящими

МОЛИТВА О ТОМ, ЧТОБЫ УХАЖИВАТЬ С ЛЮБОВЬЮ ЗА БОЛЯЩИМИ.
Господи, Иисусе Христе, Сыне Бога Живаго, Агнче Божий, вземляй грехи мира, Пастырю
добрый, положивый душу Твою за овцы Твоя, Небесный Врачу душ и телес наших,
исцеляя всякий недуг и всякую язву в людех Твоих! Тебе припадаю, помози мне,
недостойней рабе Твоей. Призри, Многомилостиве, на делание и служение мое, даждь
ми быти верною вмале; послужити болящим, Тебе ради, носити немощи немощных, не
себе, но Тебе единому угодити во вся дни живота моего. Ты бо рекл еси, о
Сладчайший Иисусе: понеже сотвористе единому от сих братий Моих мельших, Мне
сотвористе. Ей, Господи, суди мне, грешной, по сему глаголу Твоему, яко да
сподоблюся творити благую волю Твою во отраду и утешение искушаемых, недугующих
раб Твоих, их же искупил еси честною Твоею Кровию. Низпосли ми благодать Твою,
попаляющую во мне страстей терние, призвавый мене, грешную, на дело служения
о имени Твоём; без Тебя не можем творити ничесоже: посети убо нощию и искуси
сердце мое, внегда предстояти ми у возглавия болящих и низверженных; уязви душу
мою Твоею любовию, вся терпящею и николиже отпадающею. Тогда возмогу, Тобою
укрепляемая, подвигом твоим подвизатися и веру соблюсти, даже до последнего моего
издыхания. Ты бо еси источник исцелений душевных же и телесных, Христе Боже наш,
и Тебе, яко Спасителю человек и Жениху душ, грядущему в полунощи, славу и
благодарение и поклонение возсылаем, ныне и присно и во веки веков. Аминь.
("Семейный молитвослов"; "Артос - Медиа"; Москва; 2008 год)