Молитва лишившегося супруги

Христе Иисусе, Господи и Вседержителю! В сокрушении и умилении сердца моего
молюся Тебе: упокой, Господи, душу усопшия рабы Твоея (имя) в Небесном Царствии
Твоем. Владыко Вседержителю! Ты благословил еси супружеский союз мужа и жены, егда
рекл еси: не добро быть человеку единому, сотворим ему помощника по нему. Ты
освятил еси союз сей во образ духовного союза Христа с Церковию. Верую, Господи,
и исповедую, яко Ты благословил еси сочетати и мене сим святым союзом с единою
из рабынь Твоих. Твоей же благой и премудрой воли изволися отъяти у мене сию рабу
Твою, юже дал еси мне, яко помощницу и спутницу жизни моея. Преклоняюся пред сею
Твоею волею, и молюся Ти от всего сердца моего, прииме моление сие о рабе Твоей
(имя), и прости ей аще согреши словом, делом, помышлением, ведением и неведением,
аще земное возлюби паче небеснаго; аще о одежде и украшении тела своего печеся
паче, нежели о просвещении одеяния души своея, или аще небреже о чадех своих;
аще преогорчи кого словом или делом; аще поропта в сердце своем на ближняго или
осуди кого или ино что от таковых злых содела. Вся сия прости ей, яко благий и
человеколюбивый: яко несть человек, иже жив будет и не согрешит. Не вниди в суд
с рабою Твоею, яко созданием Твоим, не осуди ю по грехом ея на вечныя муки, но
пощади и помилуй по велицей милости Твоей. Молю и прошу Тя, Господи, сил даруй ми
по всея дни жизни моея не преставати молитися о усопшей рабе Твоей, и даже до
кончины живота моего просити ей у Тебе, Судии всего мира, оставления согрешений
ея. Да яко же Ты, Боже, положил еси на главу ея венец от камене честна, венчая ю
зде на земли; тако увенчай ю вечною Твоею славою в Небесном Царствии Твоем, со
всеми святыми, тамо ликующими, да вкупе с ними вечно воспевает Всесвятое имя Твое
со Отцем и Святым Духом. Аминь."
("Семейный молитослов"; "Артос - Медиа"; Москва; 2008 год)