***

СА  МАНИДИЗ…

Са манидиз яб гана за:
Гафар хайи ч1аланди тир.
Гьава адан, ат1ай чара,
Парчалайни заланди тир.

               
Какадарна,  патанбурун,
Са шумуд жуьре  макьамар,
Наз-дамахдив,  иер руша,               
Мани  ийизвай  тамамар.

      
Са кьадар  гафар,  манидин,               
Михьи тушиз, рагъулди тир.
Руьгьдиз  герек  тагуз  ифин,
Ч1алан лезет агъузди тир.


Сюжетни тир  к1анибурун
Мугьуббатдикай – «эсердай».               
Кьисмет тахьай субайбурун,
Рафтарвал  тир, – кесердай.


Гьар вуч ят1ан,  мани кхьейд,
Ви  чирвилер  усалди я.
Кьарай ат1ай,  таб текьейди, 
И устадвал мусалди я?!

 
Де лагь, гила, ихьтин мани,
Валай гъейри низ хьуй гьалал?
Алакь тийиз, чуьнуьх ийиз…               
Чи маийрал  гъимир завал!

               
Авазрин милливал патал,               
Женгинавай зун са кас я.               
Хва текьейди, жемир нахал…             
Вун хьтиндаз  зун кьисас я!

 
Эхирдал кьван яб гана за,
А манидиз, рик1 хъуткьуниз.               
Манид иес вилик квайт1а,               
Мажбур жедай тфу гуниз…