100. Шкьакь Пирим

 Шкьакь Пирим лугьур са кас хьана кьван; имни гзаф
мешакъат, мискьин са итим хьана кьван.
Идан мешакъатвал, шкьакьвал виридаз машгьур хьана.
Къаркай са къуз идан к1вализ са мугьман атана кьван.
Ида хуш-бешна мугьмандин вилик чай гъана эцигна.
Шекердин к1усар мухан ттварар хьтин гзаф куьлуьбур
хьунухьиз килигна, и мугьманди кьвед-кьвед, пуд-пуд
къачуз сивиз вегьена. Шкьакь Пирима хъел кваз вичин
сас регъвез хьана. Мугьманди са истикан чай хъвана,
ида чукьнач. Кьвед лугьур истикан хъвадайла, ада мад
кьвед-кьвед, пуд-пуд къачуз сивиз вегьена.
Эхир Шкьакь пирима акъвазиз тахьана, лагьана:
 -Я стха, жузун айиб тахьуй, куь хуьре кьейибур сура
са-сад ттвадани, кьве-кьвед?
 -Валлагь, Пирим халу,- лагьана мугьманди, -чи хуьре
ч1ехибур хьайила, гьар сад са сура, гъвеч1ибур кьвед,
пудни са сура ттвадай адет ава.

( Ахцагь райондин Хуьруьгви М. Амрагьавай
Гаджиев Агъалара кхьейди я).