Чаз мектебда к1елиз-кхьиз чир авур,
Илимдикай рик1е дерин сир авур,
Чаз уьмуьрда гьар ч1авуз хийир авур,
Пак инсан я чи гьуьрметлу муаллим!
Дагъ хьиз ч1ехи, набататрив ац1анвай,
Варз хьиз экуь, гъетер кьилив атанвай,
Рагъ хьиз чими, нурар гьарнихъ чк1анвай,
Пак инсан я чи гьуьрметлу муаллим!
Гьар баладихъ акализ яб дикъетдив,
Дуьзвал авай рехъ къалуриз лезетдив,
Ац1анавай чирвилерин девлетдив,
Пак инсан я чи гьуьрметлу муаллим!
Къушариз хьиз, гьардаз вичин ч1ал авай,
Сабур, гьахъвал, намус, к1анивал авай,
Насигьатар чав пайзавай сал авай,
Пак инсан я чи гьуьрметлу муаллим!
Къефле-къефле лув гуз физва виликай,
Картар хьтин , жегьилар куь гъиликай,
Шегьреяр хьуй куь зегьметдин рекьикай,
Пак инсан я чи гьуьрметлу муаллим!
Гьар инсандиз ава муаллим вичин,
Хуш гьиссерив ац1урдай дегьне рик1ин,
Рик1ел хкиз ийизва квез чими кин,
Пак инсан я чи гьуьрметлу муаллим!
Секина. Муаллимдиз
© Copyright: Магомед Мирзоев Мирзой, 2024
Свидетельство о публикации №124101607543
Свидетельство о публикации №124101607543
Рецензии