99-1. Зун текьей, вун гьик1 кьена?

Эвел заманда са хуьруьн жемятдиз чпиз са миск1ин
эцигиз к1ан хьана. Ибрукай са ц1усад кас миск1индик
кутвадай чукьванар, гъварар гъиз са къуз тамуз фена;
ибрувни гьардав са як1в гвай кьван. Тамуз атана
агакьайла, ибру як1вар гьисабна, килигайт1а-вири
ц1уд як1в ава:
 -Яъ, я стхаяр,-лагьана и як1вар гьисабайда,-чун
ц1усад кас ава, як1вар- ц1уд. Бес ц1усад лагьай
як1в гьинава? 
 Ибрун арада къал-макъал, гьуьжет гьатна.
Юлдашрикай гьида гьисабайт1ани, ц1уд як1в жез хьана:
гьар сада вичи гьисабдайла, вичив гвай як1в гьисаб
тийиз хьанай кьван. И арада анхъай ламни гваз са маса
хуьруьнви атана акъатна. Ибру идаз лагьана:
 -Я стха, чи гьуьжетар ава, ваз минет хьуй, чав шмуд
як1в гват1а, вуна гьисаб ая ман.
 -Квев ц1усад як1в гва ман, мад гьисабна вучда кьван?-
 лагьана и касди.
 -Ваъ, чна гьисабна - чав ц1уд як1в гва,- лагьана ибру.
 Ибрунни и касдин арада гьуьжет хьана.
 -Квев ц1усад як1в гваз хьайит1а, абур заз хьуйни? -
лагьана и касди.
 -Ваз хьуй! -лагьана ибру.
 -Ак1 ят1а, куьне вирида квев гвай як1вар ччилел эциг,
за гьисабда,- лагьана ада.
 Ибру чпив гвай як1вар вири ччилел эцигна, санал
к1ват1на, ада гьисабна ц1усад як1в ава, къахчуна
вичин ламрал эхцигна гваз хъфена.
Ибур мягьтел хьана амукьна...