96. Кьелен вир

Кечмиш заманда кьелен винел харж эцигнавай, ам гзаф
кьит тир. Кьел гъун патал маса вилаятдиз фена, пулар
харжна еке зегьметар къачун лазим тир.
 Са дагъдин хуьр хьана; и хуьрунбур гагь балк1ан,
къатир жигъин тийиз, гагь рехъ ч1уру яз, кьел гъиз 
тежез гзаф азиятдик хьана. Ибру са чуьлда са пуд рат
алай кьван чка эгъуьнна гьазурна ва к1вали са чувал
кьел гъана, гьаниз вегьена, ахпа иниз яд ахъайна.
Хъуьт1уьз мурк кьуна инаг виниз акъатна.
-"Гила чаз кьелен мяденар жеда,-лугьуз ибруз гзаф
хвеши хьана. Гатфариз мурк ц1раз инаг агъуз аватиз
хьана. Ибру мад к1вали са чувал кьел хъивегьна, яд
ахъай хъувуна. Ваъ, хьанач, гатуз инаг мадни агъуз
аватиз, яд т1имил жез хьана.. И ч1авуз са итимди
лагьана:
 -Валлагь, и чи кьел душманри чуьнуьхзава, инал
къаравулар акъвазарна к1анда.
 Амайбуруни идан гаф тестикьарна, ибру инал къаравулар
акъвазарна. Йифиз кьел чуьнуьхиз касни атанач, югъ
хьайила и вирелай са т1вет1 къарагъна са къаравулдин
пелел ацукьна. Ам катиз кич1ела ида рахунни тавуна:
"Ухь-хь-хь-хь-хь-хь",-авуна уьфт яна,туп1увди вичин
пелел ацукьнавай т1вет1 къалурна; кьвед лагьай
къаравулди гьасятда туьфенгдалди ам яна,-т1вет1ни кьена,
итимни.
 Туьфенгдин сесиналди жемятар атана акъатна; ибру
къаравулривай жузуна:
 -Гьик1 хьана, им вуч хабар я?
 Къаравулри т1вет1ни итим кьведни къалурна лагьана:
 -Валлагь, стхаяр, сад чакай кьена, сад чпикай.

(Ахцагьви Меджидов Жалалавай Гаджиев Агъалара
кхьейди я. Ноябрь-1940йис.)