Ватан, халкь, ч1ал

Такабур дагълар къелеяр хьиз чилел,
Пагьливанар я хуьзвай пак лезги чил,
Аламай кьван абур чи халкьдин рик1ел,
Гьич садрани чал къведач душмандин гъил.

Сабурлу я чи халкь, тухузвай дуьз рехъ,
Гьич к1андач яланчивал,табни фитне,
Азадвал к1ани халкьдиз лугьузва лекь,
Ислягьвал я герекди халкьдиз сифте.

Зи ватандин гуьрчегвилел кьарубур,
Алахъзава авадан хьун паталди,
Лезги халкьдин алакьунар такурбур,
Ша илифа лезги чилел гаталди.

Халкьдин ч1ал я мезни, хци яракьни,
Гагь гъалибвал манидалди къачуда,
Дустар къвалав агуддай я улакьни,
Халкь садвилин суфрадивни агудда.

Эхь, зи ватан гуьрчегни я, масанни,
Къудратлу я халкьни вичин гьайбатдал,
Тажуб я рик1ерал чара инсанни,
Михьи руьгьерин къастарин къуватдал.

Сагърай ватан, зи уьтквем халкь, зи ч1ални,
Галукь тавуй садрани чахъ са т1ални,
Бахтлу хьурай ислягь тир  гьар са к1вални,
Квахьуй дуьньядай мидявал ва къални.

08.10.2024.