СтIал Сулейманаз
Гьар шаирдин бахт тушни и чилерал,
Халкьдин рикIе чIехи дагъ хьун эбеди?!
Вун, Сулейман, хвена элди гъилерал,
ХвеначтIани лай-лай ягъиз дидеди.
Эхна вуна кашар-мекьер, етимвал,
Дидедин нек тахьана гьич руфуна.
Гьич садрани квадар тийиз итимвал
Намус хвена на зегьметар чIугуна.
Инкъалабдин ракъинин нур аватна,
Кесибвили кармаш авур рикIерал.
Четин йисар са ахвар хьиз алатна,
Хайи халкьди хкажна вун гъетерал.
Тариф ийиз ватан кIани инсандин,
Аса гьалчиз жавагьирар туькIуьрна.
Къадир пак хуьз хайи халкьдин,ватандин,
На инсанрин рикIера экв куькIуьрна.
Каспи гьуьлуьн шагьвар акьаз бапIахда,
Къвазнава вун атай касдин салам кьаз.
Лезги халкьди гьамиша вал дамахда,
ЧIехи бахт я вун Аллагьди гунал чаз.
РикIера экв куькIуьрна
© Copyright: Владик Батманов, 2024
Свидетельство о публикации №124100802920
Свидетельство о публикации №124100802920
Рецензии