89. Ламра азан гана

Къаркай са къуз малла Несредина сив хвена; и къузни
им къунши хуьруьз физваз хьана. Нянихъ сив хкудун
патал  гьебеда са кьве фуни ттуна им рекьиз экъеч1на.
Са кьадар рехъ фейила, идаз гишин хьана, югъни атана
нисини хьана. Эхир мад идавай гишила акъвазиз тахьана,
ида вичи-вичикди лагьана: "Уьмуьруллагь и зи яшинда
за сив хуьн тавур, къе и рекье авайла хуьдани? Вагь и
адетар эцигайбур гурба-гур хьуй!"- лагьана ида гьебедай
фу акъудна нез башламишна. Гьа и арада анхъай са пуд
кьуьзуь итим хтана. Ибру, тажуб хьана, лагьана:
_Я малла, им сивхуьнин варз тушни?.. Гьич азан таганмаз
сив хкудун жедай кар яни?.. Ваз утанмиш тушни фу нез?..
 Бес вуна чун алдатмишиз чав вучиз сив хуьз тазва?
 - Заз азандин ван хьана, гьаниз килигна за сив хкудна,-
лагьана малла Несредина.
 - И чаз тахьай азандин ван ваз гьинай хьана я малла?-
лагьана жузуна кьуьзуьбру.
 Гьа и арада малла Насрединан ламра, кьил цавуз кьуна,
гзаф к1евиз ар ягъиз башламишна.
 -Квез ван хьаначт1а, ингье яб акала, гьикьван хъсан
азан гузват1а аку, -лагьана маллади.
 -Я малла, вун аси жемир, ам азан туш, ам ламра ягъизвай
ар я, -лагьана кьуьзуьбру.
 -А чи фекьийри гузвай азанрилай, и ламра ягъизвай ар
вишбара хъсан я, -лагьана жаваб хгана малла Несредина.

(Дукъкъузпара райондин Мискискарин НСШ-дин учитель
Гамзаев Гамзадвай Гаджиев Агъалара кхьейди я.
Ноябрь-1940-йис.)