65-2. Пачагьдин мегьтер Лукьман

"Пагь,-лагьана пачагьди,-я ччан хва, гьич заз ван хьайи
 гаф туш гила дахьана". Инлай хабар кьада пачагьди вичин
назирдигай, вазирдигай: "Бес квез низ чидайди я, низ
чидайди туш Жизир-Бабилдиз фидай рехъ". Инбурани лагьана:
"Гьич чи яшинда чаз ван хьайи гаф туш". Ахир пачагьди
эверна к1ват1на вичин гъилик квай кьван ахъсакъалар,
хабар кьада инбуругайни: "Бес квез низ чидайди я Жизир-
Бабил лугьудай чка?" Инбурани лугьуда: "Чаз ван хьайи
гаф туш". Инлай пачагьди хабар кьада: "Мад амашни яшлу
итимрикай?"-лагьана. Назирди лугьуда хьи: "Бес сад ама
350 юс хьанвай, я алай чкадлай къарагъизни тежезмай".
Инлай пачагьди буйругъуна вичин назирдиз: "Бес,-лагьана,
-к1ула кьуна кьванни гваз хъша гьам иниз". Инлай назир
фена чипин са мегьтерни галаз, хъияана ин назирди вичин
мегьтердин к1улаз ин кьуьзи касни гваз хтана пачагьдин
кьилиг. Пачагьди лугьуда, япал т1иш эцигна: "Ваз ван
 хьайиди яни Жизир- Бабил лугьудай чка?" Ин кьуьзи касди
лугьуда хьин: "Бес, ччан хва, флан чи сергьятдин а пад
Жизир-Бабилдин сергьят я, ччинеррин пачагьдин". Инлай
пакадин юкъуз акьадарна балк1андал Лукьман, агалдарна
вичин къазахрикайни дуьз гьан сергьятдалди агакьарна
лугьуда. Инлай къазахар элкъвена хтана, Лукьманни
Жизир-Бабилдин сергьятда фена гьатна.