Секина. Шехьзава зун

Шехьиз-шехьиз зун дуньядиз атана,
Са пип1е заз жуван чка жагъана,
Шукурзава сад Аллагьдиз дат1ана,
Марф хьиз зулун, утлметрихъ зун шехьзава.

Кук1уп1ди хьиз, шаракар гъиз гьин-гьана,
Ац1урзава аялрив етимхана,
Диде кьилив атунихъди вил хьана,
Гъафил хьанвай етимрихъ зун шехьзава.

Дяведин ц1а бубаяр телеф хьана,
Лувар ханвай, къушар хьиз бейкеф хьана,
Пекеркайни чпел алай сеф хьана,
Са кьас фуахъ к1евевайдахъ шехьзава.

Сефилдаказ тамаш ийиз вилериз,
Килигиз гьак1 чанта авай гъилериз,
Дарман тежез чандал алай хирериз,
К1вал авачир гьайванрихъ зун шехьзава.

Михьи инсан кьац1ур ийиз алахъиз,
Таб-гьилледкай гьар камуна пайдахиз,
Гунагьди пар к1ула кьуна, дамахиз,
Руьгьерин экв зайифбурухъ шехьзава.

Инсанвилин пак хесетар хкатна,
Ч1ехи-гъвеч1и гьуьжетарив агатна,
Арадавай хатур-гьуьрмет ахкъатна,
Т1акьазвайдахъ гъавурда зун шехьзава.

Чи уьмуьрдин умударни девлетар,
Гьелбетда я гьар са касдин веледар,
Къе балаяр кучуднавай сура дар,
Рик1ер ч1улав дидейрихъ зун шехьзава.