Секина. Ватан хуьзва чи кьегьалри

Чи бубаяр, цавар хьтин виневай,
Чи стхаяр, дамар хьтин рик1евай,
Чи рухваяр, жегьил чанар, вижевай,
Къе къуллугъда къвазнава чи Ватандин!

Хьурай лугьуз хайи чилихъ абадвал,
Хуьн паталди чи виридан азадвал,
Хвена намус аваз арада садвал,
Къе къуллугъда къвазнава чи ватандин!

Бушлатдикай къайи чилел мес хьана,
Япара пис гуьлледин, ц1ун сес хьана,
"Сушкайринни" "сухпайрин" иес хьана,
Къе къуллугъда къвазнава чи Ватандин!

Низ т1ак1ан я, чими гатуз ацукьиз
Таран к1аник, серин шагьвар галукьиз?
Пис йифериз къай-марфадик кумукьиз,
Къе къуллугъда къвазнава чи Ватандин!

Диде-буба шехьиз, тефиз ахвариз,
Балаярни свас тамашиз рак1ариз,
Сад Аллагьдиз къариблухда ялвариз,
Къе къуллугъда къвазнава чи Ватандин!


Къуй хурудал алай нурлу гъетери,
Хайи Ватан парламишрай экверив,
Дяведин т1вар теххьин патал чилериз,
Къе къуллугъда къвазнава чи Ватандин!

Ислягь хьана вири дуьньядин гьалар,
Ачух хьурай гьар са касдин гуьгьуьлар,
Аманат хьуй Аллагьдал куьн жегьилар,
Къе къуллугъда къвазнавай чи Ватандин!