Секина. Чи халкьдин дамах

Чи Дагъустан гьар миллетрин макан я,
Чи Дагъустан пагьливанрин ватан я,
Чи Дагъустан цаварив кьван кьакьан я,
Дагъустандал гьар са инсан гьейран я!

Лезги халкьдиз гзаф ава дамах тир
Пак рухваяр, уьлквединни даях тир,
Абрукайни сад я "лётчик-командир",
Баркаллу хва, лезги Гаджиев Тагир!

Акьалт1арна вадрал Билижди мектеб,
Цава лув гун тир адан мурад-метлеб,
Къуллугъарна ч1ехи, хвена ягь-эдеб,
Баркаллу хва, лезги Гаджиев Тагир!

Асландин хьиз, вик1егьвал аваз рик1е,
Т1арамдаказ къастар кьуна кьве гъиле,
Тамамарна буржияр авай хиве,
Баркаллу хва, лезги Гаджиев Тагир!

Хзандикай тирт1ани вич лап яргъа,
Чи бубайрин руьгьериз тир ам мукьва,
"Къад агъзур сят" лув гана лякь хьиз цава,
Баркаллу хва, лезги Гаджиев Тагир!

Гьар са пип1е самалутдик кутаз звер,
Сес акъудиз, юзуриз цавар-чилер,
Нурар гуз, хуралла къизилдин гъетер,
Баркаллу хва, лезги Гаджиев Тагир!

Къуй уьмуьрдин гьар ч1авунин вахтара,
Мублагьдаказ лезги дибдин тарарал,
Бегьер хьурай, тариф авай цавара,
Баркаллу хва, лезги Гаджиев Тагир!