Гьайиф къвезва жегьил вахтар,
Жува кана жуван бахтар.
Хиялар зи яз жаллат1ар,
Ахъайнай хьи бул гъалат1ар.
Багъри хьанач рехъ къалурдай,
Дустар хьана жув алаждай,
Фагьумнач я писни хъ(и)сан,
Келлегуьз са хьана инсан.
Чарабурун кар туьк1уьриз,
Жуван рик1е экв туьхуьриз,
Нубатсуздан жедай арха,
Са небгетдиз жедай заха.
Дуст-душманни гьич чир тежез,
Къуллугърикай хийир тежез,
Даим жегьил жеда лугьуз,
Уьмуьр хьана шаддиз тухуз.
Фагьумнач гьич жедайд кьуьзуь,
Рик1ни жедайд къванцин къузи,
Ц1ару цуьквер кьурадайди,
Уьмуьрди жув гатадайди.
Фена йисар, хьана яшар,
Мегъуьн тарциз хьана ухшар,
Дувул ама хайи чиле,
Гатфар ама кайи рик1е.
23.09.2024.
Гатфар ама кайи рик1е
© Copyright: Нажмудин Шихнабиев 2, 2024
Свидетельство о публикации №124092406276
Свидетельство о публикации №124092406276
Рецензии