ВАЧ ГИЛА...
Вуна пел тIалабнай, сувар гана за,
Чилер тIимил акваз, цавар гана за,
Жувакай атIана лувар гана за…
Какахьай рекьера алатнава зун,
Секиндиз вач гила, галатнава зун.
Гьелегьар бес тушни, ргаз алахьмир,
Фитнейрин лепеяр залай алахмир!
Бес я мад ,тахсирар кутаз алахъмир,
Буьгьтенрин селлерик акатнава зун,
Секиндиз вач гила, галатнава зун.
Ваз и къакъатуни хвешивал гъурай,
Гадарай шикилри сабурар гурай,-
Инсан кIанибурун рикIера хьурай.
ГъуьнтIерин гапурди алатIнава зун,
Секиндиз вач гила, галатнава зун.
ГъалапIна зи руьгьди, гьай ганач вуна,
Чимивал кIан хана, пай ганач вуна,
Туьхьуьзвай са къулаз цIай ганач вуна,
Килиг, мад къакъарай акъатнава зун,
Секиндиз вач гила, галатнава зун…
Б.А. 2024
© Copyright: Билал Адилов, 2024
Свидетельство о публикации №124091907041
Свидетельство о публикации №124091907041
Рецензии