Секина. Диде

Зун дуьньядал атун тавунмаз гьеле,
Азан хьтин, къвезавай ви ван, диде.
Ракъинин хьиз, нурар акьазвай пеле,
Багъишнай заз вуна чими чан, диде.

Гьикьван дадлу, ширин ят1а дидед нек
Чизва, гьелбет, гьар са таза куьрпедиз.
Са геренни бала туш дуьньядал тек,
Малаик хьиз, дуьа гала дидедин.

Лепейривди, алахьиз къвез гьуьлелай,
Уьк1уь кьелер агатзава къумадив.
Насигьатдин тарсар къвезва мецелай,
Къайгъу ч1угваз йикъуз-йифиз баладин.

Вири эхда бала патал дидеди,
К1анивилин хара чандал алук1на.
Дидед гъилин къулайвал я кьет1енди,
Рик1евай мурк1ар ц1урурда ацукьна.

Диде- т1варц1ин, кьуд гафунин куьруь тир,
Мана-метлеб дуьнья кьадар ч1ехи я,
Шумуд бала ават1ани хайи тир,
Дидед рик1и гузавай экв хцуь я.

Каинатда гьикьван гъетер ават1а,
Пак чилерал гьикьван цуьквер алат1а,
Ачух дуьнья гьикьван мад иер ят1а,
Ви вилерай аквазва заз, диде чан!

Къай галукьай пешер хьтин юзазвай,
Гьар баладив дидедин рик1 рахазва,
Амма, гьайиф, къе са бязи балайриз,
Зайиф хьанвай дидедин рик1 аквазвач.