Шел къвезва мад, вун зи рик1ел атайла,
Телефондай ширин-ширин рахайла,
И дуьньяда чун сад садаз жагъайла,
Вучиз санал алай туш чун, к1ани яр?
Акваз-такваз чи уьмуьрди ялзава,
Накьан нуьк1ре вичиз дуьне гьалзава,
За дат1ана жува жувак къалзава,
Вучиз санал алай туш чун, к1ани яр?
Чаз ак1 ава: чун дуьньядал атана
Амукьдай хьиз, гьа и тегьер, дат1ана.
Икьван к1ани чун куьз ава сад-сана,
Вучиз санал алай туш чун к1ани яр?
Авач мензил чи арада лап еке,
Кьве хали кьаз к1ан жемир ваз са гъиле,
Рик1е ялав аваз, къанва месер къе,
Вучиз санал алай туш чун, к1ани яр?
Вучиз къе захъ цуькведи кьур гад авач?
Фикирдай кьван, уьмуьрдикай дад авач.
Са уьмуьр я чахъ авайди, къад авач,
Вучиз санал алай туш чун, к1ани яр
Секина. Вучиз санал алай туш чун, к1ани яр?
© Copyright: Магомед Мирзоев Мирзой, 2024
Свидетельство о публикации №124090806780
Свидетельство о публикации №124090806780
Рецензии