60. Сик1ни жанавур

Са сик1рез са сефер са киттаб жагъана кьван.
Имни, и ктаб ахъайна, азукьнавайла, им са
жанавурдиз акуна. Жанавурди идавай жузуна:
"А ви вилик квайди вуч я?"- лагьана.
И сик1ре лагьана: "Имми зи киттаб я".
Жанавурди лагьана: "Ваз к1елизни чидани?"
Сик1ре лагьана: "Вагь, им вуч гаф я?
Зи яхц1ур сухта ава, къанниц1уд йис я за
сухтайриз тарс гуз".
Жанавурди лагьана; "Ак1 ят1а, на зи аялризни
тарс гана к1анда".
Сик1ре лагьана: "Гзаф хъсан жеди".
И жанавурди вичин аялар гъана, сик1рел тапшурмишна.
Ида сик1ревай жузуна: "Квез к1ани-дак1ан авани?"
И сик1ре идаз лагьана: "Заз к1андайди ви сагъвал я,
амма ви аялриз к1уртар авунин патахъай са т1имил 
к1елерин хъицикьар к1ан жеда".
Жанавурди фикир авуна: "Эгер за хъицикьар тухуди,
ими заз айиб кар я"- лагьана идани са къанниц1уд
к1ел сик1ре к1вализ тухвана.
И сик1ре идаз лагьая:
"Мад вун гатфаралди атун герек туш".
И жанавур архайин хьана, хъфея. И сик1рени эвел
жанавурдин аялар т1уьна, ахпа башламишна йикъа са
к1ел нез.
Гатфар хьайила, жанавур вичин аялрал кьил ч1угваз сик1ре
 к1вализ фена. Ида сик1ревай жузуна: "Зи аялар гьинава?"
 Сик1ра идаз лагьана: "Къе жуьмя югъ яз акурла, сухтаяр
 сердиз фенва, ви аяларни абрухъ галаз фенва; къе ваз аялар
 аквач, вун пака ша аялар акваз".
 И жанавур хъфейла, сик1рез чирхьана хьи, вич жанавурди рекьидай
 ч1ал, имни инай экъеч1на фена, са регъве акъвазна. Жанавур пака
 къуз сик1ре к1вализ фена, клигайт1а, к1вале касни амач.  Идаз
 чирхьана вичиз сик1ре амал авур ч1ал, идаз хъел атана, им гьатра
 сик1рехъ къекъвез. Идаз и сик1 са регъве жагъана, им идал
 тепилмиш хьанамаз, и сик1ре идаз лагьая: "Я стха, на зун куьз
 рекьида, зи тахсир вуч я?" Ида лагьана: "Ви кьилив гвай зи аялар
 гьинава?"  Ида лагьана: "Вуч аялар?" Жанавурди лагьана: "Зи аялар
 ви кьилив к1елиз гъанчирни?" Сик1ре лагьана: "Вагь, к1елун гьинай,
 зун гьинай, зи ата-бубадин пеше и регъуьз къуллугъ авун я, зи бубани
 и регъве кьена, къад йис я зун и регъве аваз". И жанавурди идаз
 лагьана: "Ак1 ят1а на зазни регъуьхбанвал чира-т1ун". Сик1ре лагьана:
 "Ак1 ят1а, на и регъуьн къванцик ви кьил кутур, за ваз и регъуьн
 тегьерар къалурин".  Жанавурди регъуьн къванцик кьил куттуна,
 акъвазна. И сик1рени фена регъуьх яд агалдарна. И регъв
 элкъвенамаз, жанавурдин кьилин хамар алаж хьана.
 И сик1ни катна фена, са к1унт1ал куткунар храз акъвазна.
 И жанавурни регъвяй экъеч1на, ина ана къекъвена, им килигайт1а,
 - сик1 са к1унт1ал алазва.
Имни тепилмиш хьана, и сик1рел фидайла, сик1ре лагьана:
"Я ччан стха, на зун куьз рекьида, зи тахсир вуч я?"
И жанавурди лагьана: "Гьарамзада, зи аялар т1уьрди бес тахьана,
мад зи кьилни регъуьк кутуна,мад гила зун алцурардалда вичи, гьа!"
 И сик1ре лагьая: "Валлагь, стха, ам зун туш, зи ата-бубадин пеше
 и к1унт1ал куткунар хурун я". Ик1 лагьайла, и жанавур ч1алахъ хьая. 
Ида идаз лагьая; "Ак1 ят1а на зазни куткунар храз ччира-т1ун".
Сик1ре лагьана: "Ак1 ят1а, ша вун и куткундин къениз ацахь,
за хран, на фагьум ая". И жанавур куткундиз гьахьна, сик1ре
куткун храна; куьтягьнамаз, и куткундин кьве кьилни к1евирда,
и куткун гуьнедай агъуз авадарна. И гуьнедин к1ане хпер гваз,
чубанар авай кьван. И сик1ре гьарайна: "Я чубанар, инай къвезвай
куткунда куь хпер недай душман ава". И чубанарни килигайт1а,
- куткунда са жанавур авазва, ибруни им гатана-гатана кьена.

(Усларан ктабдай кхьейди я, литературный ч1алав кьадайвал
 жизви дегишвилер ттунва).